Usssjjjj!!

Usj! Gal mun ikte ledjen dan gullon klišje mielas! Muhto nu dat láve olmmoš go nuppi olbmui gesso. De leat jurdagat olu girddašeame daid rosa balvvaid siste. Nugo mus ge ikte.

Otne gal gahčče fas jurdagat eatnamii. Na goit juobe várit rádjai. Eai hal meara botnis gal leat vel. Eai vel. Muhto dan ii dieđe, bissot go balvvaid siste vai vudjot go meara bodnái. Ja nu doppe vajálduvvet.

And I am doing it again!!! Reality come and get me! Dahje, it don dárbbaš gal.. ;-D

Muhto go juo lean dáppe de ferten muitalit dan somás fearána birra. Mus ii leat digitálagovvenrusttet. Na justte dat gal ii leat mu mielas nu beare somá gal. Muhto dat mearkkaša ahte mun govven olu govaid iežan telefovnnain. Ii dat ge leat nu beare somá go ii mus leat diekkár buorre ođđa tlf. Dan gal ii leat. Ii mus leat gal blitza ge. Muhto gal mus lea juoga mas lea blitza, na diekkár govvenrusttet masa galget diet rullat! Justte fal, diekkár mii mus lea leamašan nuoraid skuvlla rájes. Dalle lávii nu jalla buorre ja ođas. Ja unni ja buorre dat mu govvenrusttet. Muhto go otne áiggi rusttegiiguin buohtastahttá de gal lea mu govvenrusttet dan agis ahte sáhtášii nu go penšunisttat, heaitit bargamis. Muhto son lea gal hui buorre munnje, go ii leat suhtastuvvan ja heaitán doaibmame váikko vel mun in geavat su lihka olu go ovdal. Ja go logan ahte in leat geavahan su lihka olu go ovdal, dat lea munnje duođaštuvvon dal. Go mus nogai duvle filbma, ja de sáddejin dan diekkár fremkallingai. Sáddejin boasta mielde dan, váikko in diehtán sula ge makkár govat dal áiddo leat dan filmmas. OTNE mun ožžon govaid boasttas. Ja man somá!! Hahahaha!

Doppe ledje govat das go ledjen Lulli Amerihkás mannan háve. Dat mearkkaša; 2007 giđđageasi. Doppe ledjen govven varra muhtin 10 gova. Ja muđui lei muhtomin 1 govva juohke fearanis. Eará hávit 3-5 gova juohke fearánis. Riddu Riđđu 2008, Ellen Oddveig viežžá diŋggaidis Romssas, giđanisttiid njuovvame, giđđa johtimis, miessemearkumis . . Lei dego oaidnit smávva oasažiid mu eallimis mat leat dáhpáhuvvan dan bealgoalmmát jagis go mus diet filbma lei iežan govvenrusttegis. In mun goit in sula ge muitán daid govaid! In muitán gos lean govven, maid lean govven, ja manin lean govven. Ja hirpmahuvven máŋgii go gal dat duođai ledje muhtin ráje oba heajos govat. Muhto leat goit juobe muittut. Ja somás muittut.

Lean varra mearridan ahte dal mun gal oastán digitála govvenrusttega. In mun dal šat duđa daid telefovnnain govvejuvvon govaiguin. Háliidan čielga govaid. Manin? Na vai dat govat čájehit duođaid, dan maid olmmoš duođai oaidná. Muhto movt de galgá mu mánnávuođa kamera riehpu? Ferte vel áin eambbo go ovdal leat dien sevdnjes skábes. Na na.. Nie hal lea goit.

Lea go dat dal nu šaddan dat mu bloggen ahte mun juohke mánu nuppi beaivvi čálistan juoidá ja de gollá fas mánnu ovdal mihkkege čállo fas!?!