Ártegis niehku!

Olmmoš lea ártegis ealli, nu láve mu oabbá lohkat. Ja dasa gal láven maid ovtta oaivilis dávjá. Muhto mu mielas leat olbmo niegut vel ártegeabbo. Dat maid olmmoš niegada ihkku? Gos dat bohtet? Mearkkašit go maidege? Mun álo niegadan nu olu ártegis nieguid!

Mannan ija mun niegadin ahte mun ledjen juogalágan álgoálbmot. Dan han mun lean gal nie muđui maid, muhto sevdnjesvarat álgon doppe muhtin liegga riikas. Mu niegus de gullen muhtin jovkui, ja mii leimmet áitojuvvon. Mii soađaimet muhtin soalddáhiiguin. Ja gávnnaimet iežamet njuoratmánáid vuovddis, sii ledje njuvvojuvvon, ja dušše oasit doppe. Vuoi dan niegu!! Ja de mii fertiimet cahkkehit iežamet ruovttuid ja báhtarit guhkas meahccái. Dat lei vai sii (geaiguin soađaimet) galge doaivut ahte mii leat japman, vai eai oagut min šat. Mun muittán vel dal ahte ledje oasit dan niegus gos bođii ovdán ahte mis lei soames jođiheaddji, ja su nieida lei maid gottáhallan, ja sus lei hirbmat váivi. Ja orui veháš dego diet nieida lei lagas fuolki munnje maid.

Dat lei hui issoras niehku. Dan gal ferten lohkát. Iđđes go lihkken, de in jurddašan dušše dan ahte man issoras dat lea. Muhto maid man buorre dilli mis lea dáppe sámis. Mii riidalit gal dáččain. Rievttit, lagat ja nu ain. Muhto min mánát goit juobe eai njuvvojuvvo, gottáhala, nu go olu álgoálbmogiid mánát, ovdal ja hui sihkkarit dal ain muhtin báikkiin máilmmis.

De lei ges dat niehkogažaldat. Mun dieđán ahte mun in gula muhtin álgoálbmogii muhtin liegga riikas. Ja mus ii leat ii mánná ge mii sáhtálii njuvvojuvvon. Dieđusge ii lean mihkkege duohta dan niegus. Muhto maid son dat mearkkaša? Ja mearkkaša go maidege oppanassiige? Lea go das muhtin lágan symbolihkka. Livčče go son dien niegus vástádusat gažaldagaide mat jorret mu oaivvis daid beivviid? Mun doarun soapmásiin? Dovdduiguin? Doarun go mun iežan dovdduiguin? Báhtarit? Háliidan go báhtarit?
Lea go nieguid oba veara ge dulkot?