"Lea go duohta ahte dus ii leat mihkkege muitalit?"

Sotnabeaivvi vudjen Guovdageainnus Kárášjohkii. Mun láven humadit telefovnnas muhtomin go vuoján biillain. Dan háve mus gal lei olmmoš mielde, don čuovui mu Guovdageidnui, ja dal lei mielde ruovttoluotta.

Go leimme vuodján Láhppoluobbala meattá, de čuojihii mu telefovdna; “Message from the darkside there is”. Diet jietna gullo go mu tlf ain ollejit dieđut. Nu ge dan háve. Olmmái dat čálii. Son jearai maid dal lean? Vástidin vuojedettiin ahte mun lean vuodjime. Árvidin ahte dal son gal lea sihkkarit jurddašan munnje riŋgestit. Son ges logai iežas dušše čohkohallame iige nu stuorráid bargame. Dasto jearai mii gullo sahkan. Vástidin moadde diŋgga mat justte dalle fuobmájin, ja jerren mii dohko sahkan gos son lea. “Ii leat mihkkege muitalit;-) Leat go akto biillas?”. Fertejin vástidit ahte lea go áibbas sihkar ahte ii leat mihkkege muitalit;-) ja ahte in leat akto, mus lea olmmoš mielde. Dalle son čálli ahte de son gal riŋge maŋŋá.

Ja nu lei ge. Go ollejin Kárášjohkii de vuot “message from the darkside there is”. “Juogo ollejit?”. Vástidin: “Jua, riŋges beare”. Ii mannan guhka ovdal čuojihii telefovdna, “Mánnu lea dal gávvut ja gárvvis borjjastit.....” Niko Valkeapää šuokŋa mii mus gullo go tlf čuodjá.

Ja nu de šattai ahte olmmái riŋgii gaskaija áigge. Moai humaime badjel guokte diimmu. Na gitta idjii. Ja gal dat sagat eai váilon mu olbmás, eai ge mus ge. Go leimme hupman 2 diimmu ja kvártta, logaime buorre iddjá nubbi nubbái. Dahje nugo lávejetne “Buorre Iddja” – “Dutnje maid”.

Mun velohallen guhka inge ožžon nahkáriid. Go nu lea, de gal balle jurddašalalit feara maid. Dan háve imaštallagohten dieid teakstadieđuid ja dan telefovdna sagastallama. Olmmái han čálii munnje “Ii leat mihkkege muitalit;-)” ja seamma dieđus “Leat go akto biillas?”. Son muitalii ahte ii leat mihkkege muitalit muhto jearai seammás ahte lean go akto biillas vai son beasašii riŋgestit munnje. Ja go de maŋŋá riŋgestii, de humaime guokte diimmu!!

Imáš go dakkár geas ii lean mihkkege muitalit háliidii riŋgestit munnje? Ja humai olles guokte diimmu?? Sávvamis sus ii leat nuppes ge “ii mihkkege” muitalit... åhh.....;-)